અષ્ટ સિદ્ધિ, નવ નિધિની પ્રાપ્તિ માટે નવલાં નોરતામાં માતા આદ્યશક્તિની ઉપાસના


વર્ષમાં આમ તો મહા, ચૈત્ર, અષાઢ અને આસો એમ ચાર વખત નવરાત્રીનું પર્વ આવે છે પરંતુ માં જગદંબાની ઉપાસની કરી રિદ્ધિ, સિદ્ધિ અને શક્તિનું વરદાન મેળવવા માટે આસો નવરાત્રીનું અનેરું મહાત્મ્ય દર્શાવવામાં આવ્યું છે. આસોના નોરતામાં નવ દિવસ સુધી ઘરમાં ઘટસ્થાપન કરીને માતાની ભક્તિ ઉપાસનમાં લીન થનાર વ્યક્તિને વહેલામાં વહેલી તકો મનોકામના પૂર્ણ થતી હોવાનું શાસ્ત્રોમાં પણ ટાંક્યું છે. કહેવાય છે કે, કળીયુગમાં ભગવાન ગણેશજી અને માતા ચંડીની પૂજા કરવાથી ઝડપી કૃપા પ્રાપ્ત થાય છે. નવરાત્રીના નવ દિવસ દરમિયાન જોગણીઓ ફરવા નીકળે છે. તેથી આ સમયમાં ઘરના આંગણે સાથિયો કરવો અને સંધ્યા કાળે દીવા, અગરબત્તી કરવા. શક્ય હોય ત્યાં સુધી ઘરમાં વધુને વધુ પ્રકાશ રહે તેવી વ્યવસ્થા કરવી. ભગવતી દુર્ગા સંપૂર્ણ જગતની સગુણ, નિર્ગુણ શકિતઓનું સ્વરૂપ માનવામાં આવે છે. તેમના અલગ- અલગ સ્વરૂપ અનુસાર કાર્યો પણ ભિન્ન છે. ભગવતી દુર્ગા જગતની પાલનહાર છે, તથા સંહારીણી અને આદ્યશકિત પણ છે. ઋગ્વેદમાં લખ્યું છે કે ભગવતી દુર્ગા બધા તપસ્વી દેવોમાં પ્રધાન છે. દેવીશકિતથી જ બ્રહ્મા, વિષ્ણુ અને રૂદ્ર ઊત્પન્ન થયા હતા. આ જગતમાં શકિતથી ઉપર બીજું કોઇ નથી. માં દુર્ગાની ઊપાસના કરવા કોઇ મુહૂર્તની જરૂર નથી. દેવી રહસ્યતંત્રમાં દુર્ગા પૂજા માટે કોઇ વિધાનની જરૂર નથી. ઘરે રોજ દુર્ગા સપ્તશતીના પાઠ કરવામાં આવે તો માં ભગવતીની કૃપા અવશ્ય પ્રાપ્ત થાય છે.

નવરાત્રિ દરમ્યાન માતાજીની ઊપાસના કરવાથી ભક્તોના ભંડાર ભર્યા રહે છે. ધન- ધાન્ય- સંપત્તિનો વધારો થાય છે. લક્ષ્મી સ્થિર થઇને આપણા ઘરમાં વાસ કરે છે. વેપાર વાૃદ્ધિ અને ધનની વાૃદ્ધિ થાય છે. ઋણ મુકિત મળે છે. આસો નવરાત્રીમાં મા જગદંબાના નવ સ્વરૂપોની પૂજા-અર્ચના કરવામાં આવે જેની પાછળ તેમની ઉત્પત્તિ અને મનોકામના પ્રમાણે અલગ મહત્ત્વ સંકળાયેલું છે. શક્તિસ્વરૂપા મા જગદંબાના નવ રૂપોની વાત કરીએ તો…

પહેલા નોરતે આદ્યશક્તિના પહેલા સ્વરૂપ શ્રી શૈલીપુત્રીનું પૂજન કરવામાં આવે છે. હિન્દુ શાસ્ત્રો અનુસાર આ સ્વરૂપ હિમાલયની પુત્રી હોવાથી તેને શૈલીપુત્રી કહેવામાં આવે છે. સૌભાગ્ય પ્રાપ્તિ માટે માતા શૈલપુત્રીનું પૂજન કરવામાં આવે છે. તેમની પૂજા માટે મંત્ર નીચે દર્શાવ્યા અનુસાર છે.

वंदे वाद्द्रिछतलाभाय चंद्रार्धकृतशेखराम |
वृषारूढां शूलधरां शैलपुत्री यशस्विनीम्‌ ||

માતા આદ્યશક્તિના બીજુ સ્વરૂપ માતા બ્રહ્મચારિણીની પૂજા બીજા નોરતે કરવામાં આવે છે. તેમણે ભગવાન શંકરને પતિ સ્વરૂપે પ્રાપ્ત કરવા તેમણે તપસ્યા કરી હોવાથી તપશ્ચારિણી નામથી પણ ઓળખાય છે. કોઈપણ કાર્યમાં અપેક્ષિત સિદ્ધિ મેળવવા માટે તેમની ખાસ પૂજા કરવામાં આવે છે. માતા બ્રહ્મચારિણીની પૂજાનો મંત્ર નીચે દર્શાવ્યા અનુસાર છે.

या देवी सर्वभूतेषु माँ ब्रह्मचारिणी रूपेण संस्थिता।
नमस्तस्यै नमस्तस्यै नमस्तस्यै नमो नम:।।
दधाना कर पद्माभ्याम अक्षमाला कमण्डलू।
देवी प्रसीदतु मई ब्रह्मचारिण्यनुत्तमा।।

ત્રીજા નોરતે માતા આદ્યશક્તિના ત્રીજા સ્વરૂપ માતા ચંદ્રઘંટાની પૂજા કરવામાં આવે છે. તેમના મસ્તક પર ઘંટના આકારનો અર્ધચંન્દ્ર હોવાથી તેમને માતા ચંદ્રઘંટા કહેવામાં આવે છે. કોઈપણ રોગમાંથી મુક્તિ મેળવવા માટે તેમજ ખૂબ સારું સ્વાસ્થ્ય હાંસલ કરવા માટે તેમની પૂજા કરવામાં આવે છે. માતા ચંદ્રઘંટાની પૂજા માટે નીચે દર્શાવ્યા અનુસાર મંત્ર છે.

पिण्डज प्रवरारुढ़ा चण्डकोपास्त्र कैर्युता |
प्रसादं तनुते मह्यं चंद्र घंष्टेति विश्रुता ||

ચતુર્થ નોરતે માતા આદ્યશક્તિના ચોથા સ્વરૂપ શ્રી કૂષ્માંડાની પૂજા કરવાથી સુંદર દેખાવ અને પ્રભાવશાળી વ્યક્તિત્વ મળે છે. આપ . તેમને આદિસ્વરૂપ અથવા આદિશક્તિ પણ કહેવામાં આવે છે કારણ કે શાસ્ત્રોમાં ઉલ્લેખ અનુસાર તેમના ઉદરમાંથી સમગ્ર બ્રહ્માંડનું નિર્માણ થયું છે. માતાના આ સ્વરૂપની પૂજાથી અષ્ટ સિદ્ધિ, નવ નીધિ મળે છે. માતાના આ સ્વરૂપની પૂજા માટે નીચે દર્શાવ્યા અનુસાર મંત્ર છે.

सुरासम्पूर्णकलशं रुधिराप्लुतमेव च ।
दधाना हस्तपद्माभ्यां कूष्माण्डा शुभदास्तु मे ॥

આદ્યશક્તિનું પાંચમુ રૂપ એટલે શ્રી સ્કંદમાતા. શ્રી સ્કંદ (કુમાર કાર્તિકેય) ના માતા હોવાથી તેમને શ્રી સ્કંદમાતા કહેવામાં આવે છે. સ્કંદમાતાનું પૂજન કરવાથી પુત્રસુખ મળે છે. તેમની પૂજાથી ભગવાન કાર્તિકેયની પણ કૃપા પ્રાપ્ત થાય છે. શ્રી સ્કંદમાતાની પૂજા માટે નીચે દર્શાવ્યા અનુસાર મંત્ર છે.

सिंघासनगता नित्यम पद्माश्रितकरद्वया |
शुभदास्तु सदा देवी स्कन्द माता यशश्विनी ||

છઠ્ઠા નોરતે માતા આદ્યશક્તિના છઠ્ઠા સ્વરૂપ શ્રી કાત્યાયનીની પૂજા કરવામાં આવે છે. મહર્ષી કાત્યાયનીએ ખૂબ જ તપસ્યા કરતા માતા આદિશક્તિ પ્રસન્ન થયા અને તેમણે પુત્રી સ્વરૂપે મહર્ષી કાત્યાયનીના ઘરે જન્મ લીધો હતો. આ કારણે તેમને શ્રી કાત્યાયની કહેવામાં આવે છે. માતા કાત્યાયનીનું પૂજન કરવાથી મનોવાંચ્છિત પતિની પ્રાપ્તિ થાય છે અને મનોકામના પૂર્ણ થાય છે. માતા કાત્યાયનીનું પૂજન કરવા માટે નીચે દર્શાવ્યા અનુસાર મંત્ર છે.

कात्यायनि महामाये महायोगिन्यधीश्वरि ।
नन्द गोपसुतं देविपतिं मे कुरु ते नमः ॥

મા આદ્યશક્તિનું સાતમું સ્વરૂપ એટલે કાળરાત્રિ. કાળ એટલે સમય અને વિનાશ. અર્થાત મા કાળરાત્રિ કાળનો પણ નાશ કરે છે. માતા કાળરાત્રિની પૂજા કરવાથી શત્રુ પર વિજય હાંસલ કરી શકાય છે અને જીવન અંધકારથી ઓજસ તરફ જાય છે. માતા કાળરાત્રિની પૂજા માટે નીચે દર્શાવેલા મંત્રનો જાપ કરવો.

वाम पादोल्ल सल्लोहलता कण्टक भूषणा |
वर्धन मूर्ध ध्वजा कृष्णा कालरात्रि भर्यङ्करी ||

શાસ્ત્રો અનુસાર આઠમા નોતરે આદ્યશક્તિના અષ્ટમ સ્વરૂપ શ્રી મહાગૌરીની પૂજા કરવામાં આવે છે. તેમનો વર્ણ ગૌર છે અને ચાર હાથ તેમજ ત્રણ નેત્ર છે. દુનિયાના તમામ અનિષ્ટ બળોથી માતા મહાગૌરી મુક્તિ અપાવે છે અને ભૌતિક જીવનના તમામ દુઃખોથી મુક્તિ મળે છે. માતા મહાગૌરીની પૂજા માટે નીચે દર્શાવ્યા અનુસાર મંત્ર છે.

श्वेते वृषे समारूढा श्वेताम्बरधरा शुचिः |
महागौरी शुभं दद्यान्त्र महादेव प्रमोददा ||

આદ્યશક્તિનું નવમું સ્વરૂપ એટલે શ્રી સિદ્ધિદાત્રી. જીવનમાં તમામ પ્રક્રારની સિદ્ધિ હાંસલ કરવા માટે તેમજ સફળતાના શિખરે પહોંચવા માટે માતાજીના આ સ્વરૂપની ભાવપૂર્વક પૂજા કરવાથી અચુક ફળ મળે છે. માતા સિદ્ધિદાત્રીની પૂજા માટે નીચે દર્શાવ્યા અનુસાર મંત્ર છે.

सिद्धगधर्व यक्षाद्यैरसुरैरमरैरपि।
सेव्यमाना सदा भूयात सिद्धिदा सिद्धिदायिनी।।

માતા આદ્યશક્તિ અને ગણેશજીના આશીર્વાદ આપની સાથે રહે તેવી શુભેચ્છા,
ગણેશાસ્પીક્સ ટીમ


share
14 Oct 2015